МОЛЕНИЕ О МОСКВЕ

МОЛЕНИЕ О МОСКВЕ
41(254)
Date: 13-10-98
Владыко, всем Царю и Господи Исусе Христе Сыне Божии, ради Честнейшия по плоти и Пречистыя Матери Твоея, и бесплотных Твоих Ангел, пророка же и Предтечи и Крестителя Твоего, всехвальных и богоглаголивых же апостол, светлых и добропобедных мучеников и святаго славного великомученика и Победоносца Георгия, и святаго мученика и чудотворца Трифона, и святых триех святителей Петра, Алексия и Ионы, и с ними же святителя Киприяна и Макария, и священномученика Филиппа, и священноисповедника Ермогена патриарха, и нового исповедника Тихона, и преподобная и богоносная отца наша великого Сергия чудотворца, и благоверного князя Даниила, и преподобного отца и зографа Андрея, и преподобнаго и премудраго отца Спиридона, и блаженная же Максима и Василия, Христа ради уродива, и преподобныя матери наша благоверныя Евфросинии, великия Московския княгини, и всех преподобных и богоносных и иже во святых отец и матерей наших и благовернаго страстотерпца отрока Димитрия, царевича Московского, и за всех Твоих святых молитвы и по великой Своей Милости, помилуй и спаси богохранимый и прекрасный Третий Рим, сиречь великий и славнейший царственный град Москву со вся люди, молящия и притекающия к Тебе, Боже, и приими сие молебное пение от немощных и недостойных уст наших, и огня вечнаго избави, очищая, просвещая, исправляя, исцеляя и вразумляя нас, и державе нашей на враги одоления и победы сподобляя, недоуменныя в покаяние прилагая и в благоверие же изменяя, направляя и наставляя нас на путь спасеныи, Честным Крестом Твоим нас ограждая, насилия дияволя и льсти свобождая, и нашествия иноплеменных и от всяких бед и зол изымая Свой град и люди, и благословение нам даруя, и жизнь, и силу, содействием Пресвятаго Духа и честными Пречистыя мольбами. И, Господи Христе Боже, Спасе наш, славу и хвалу, честь и благодарение, и славословие Тебе возсылаем, и поклонение творим, со Безначальным Твоим Отцем и божественным и Животворящим Твоим Духом, и со пресвятою Госпожею Богородицей и Приснодевою Мариею.
Ныне и присно и во веки веков, аминь.